قصيدة “شو بخبرك ع الحال يا جرجي” للشاعر سليم علاء الدين

شو بخبرك ع الحال يا جرجي

من غيبتك وظروفنا حرجة

بالوعي مننزل شي عشر درجات

كا ما طلعنا بالفهم درجة

ولبنان ما شا الله ع هل أرزات

كل الدني بتشوفها فرجة

والشعب تيشوف الهنا هيهات

لا جيبتو فيها ولا القجة

وصار العميل بموطني بالذات

تتحاكمو ما فيك تسترجي

حاكم بامرو الناس والرزقات

ويا ويلنا لولا طرق غنجة

بينزل علينا الهم والويلات

وما بننحسد لولا طعج طعجة

باسم الطوايف يخلق الازمات

وعن همنا بيبعد الضجة

بالابطال متلك في لهم صولات

الـ بيحبهم متل العمل حجة

كرمال ارضي رخصوا الدمات

وتخلدوا بالحبس الفرنجي

نسينا بانن شعلوا الجبهات

تيحرروا التلات والمرجة

وخلوا النصر بجنوبنا حكايات

تا هج صهيوني بفرد هجة

حتى برصيدو يكترو الشيكات

هل حاكم الـ بالغرب مستنجي

لولا حكي عنك على الشاشات

بيقول مجرم انت ديونجي

المجرم يا جرجي الحطك بعتمات

بحجة الحجة الـما قلت عجة

شو بخبرك يا رافع الهمات

نحنا بدينا باسمك نغني

تنرجعك جايين يا جرجي

الشاعر سليم علاء الدين

الذكرى الـ 30 لاعتقال الاسير جورج عبد الله

قصر الاونيسكو ، بيروت، 11 / 11 /2013

اضف رد